أحچيلي على كيفك خلي اسكر بيك

اشكيلي على كيفك بالتفاصيل

مشتاگ آنه اسمعك وأسمع اخبارك

أحچيلي على كيفك خلي اسكر بيك

يابرحي الجنوب شطيب اثمارك

يلمشتل رموشك وآنه ضايع بيك

وتهت آنه أبظلام أبين أشجارك

يلشعرك ربابه وتبچي كلهه أحزان

وذبت نغمة حبيبي أبين أوتارك

وتاخذني الدموع وجسمي يبرد حيل

ولحظنك أحن وأشتهي نارك

ومن تحچي حبيبي أذكر السياب

وأذوب أبين كتبك وأعشگ اشعارك

ياروضة ورد ياأحلى شدة ياس

هنيالة أليشم من طيب أزهارك

أحچيلي على كيفك والله مشتاگ

وأريد بحظرتك هليوم أتبارك

احچيلي على كيفك بالتفاصيل

مشتاگ آنه أسمعك وأسمع أخبارك

أشو........ چنك حزين تبين ومهموم

زين آنه أعرفك وأقرا أفكارك

نظراتك تفظحك ........وأعرفك زين

لان حافظ أطباعك وأعرف أطوارك

أشرحلي ودگلي شبيك مابيك

وسر أني ودضمني أبين اسرارك

أحچيلي حبيبي ابلايه اعذار

مرفوظ الهجر مرفوضه اعذارك

اشكيلي حبيبي وفضفض شبيك

وخل گلبي يهيد وتنطفي نارك

أجيتك معتني يعني آنه عندك ضيف

خطار وأجيتك معتني لدارك

وعيب أنت حبيبي تردني مكسور

وما ضن شيمتك تكسر بخطارك

ماضن شيمتك تكسر بخطارك